Húsreglur

1.gr.

Íbúum er skylt að ganga þrifalega og hljóðlega um sameiginlegt húsrými og lóð. Íbúar skulu ætið taka sanngjarnt og eðlilegt tillit til annarra íbúa og gæta þess að valda öðrum íbúum sem minnstu ónæði. Sameiginleg lóð ofan á bílageymslu er ætluð til útivistar fyrir íbúa og börn þeirra. Íbúar eru beðnir um að brýna það fyrir börnum sínum að vera ekki að leik ofan á loftræsiskúrum, í blómabeði eða í bílageymslu enda er slíkt bannað og bera foreldrar ábyrgð á börnum sínum komi til þess að þau valdi skemmdum á trjám eða blómum í blómabeðum. Ganga skal snyrtilega um sameiginlega lóð og gæta þess að nota göngustíga til að komast leiðar sinnar um lóðina.

2.gr.

Umhirða, garðsláttur og snjómokstur á sameiginlegum bílastæðum, húsrýmum og lóð er í umsjá stjórnar húsfélagsins. Undanskildar eru lóðir sem íbúðareigendur Skeljagranda 1 (Íbúðir 01-01/01-02) og Skeljagranda 3 (Íbúðir 01-03 / 0104) hafa einkaafnot af. Óheimilt er að nota sameiginlegar og / eða lóðir sem íbúðareigendur hafa einkaafnot af til geymslu á hvers konar munum eða hlutum sem valdið geta sjón og /eða lyktarmengun. Sameiginleg bílastæði húsfélagsins eru eingöngu ætluð fyrir nothæfa bíla. Óheimilt er að nota bílastæðið til geymslu á biluðum eða númerslausum bílum, bílakerrum , hjólhýsum eða tjaldvögnum. Húsfélaginu er heimilt að láta fjarlægja númerslausa bíla, bílakerrur, hjólhýsi eða tjaldvagna á kostnað eigenda þeirra enda sé þeim fyrst veitt skrifleg viðvörun.

3.gr.

Bílageymsla húsfélagsins er ekki ætluð til meiriháttar bílaviðgerða og eru slíkar viðgerðir óheimilar. Heimilt er að sinna minniháttar viðgerðum í einkastæðum í bílageymslunni eins og bremsuviðgerðum, sem og þrifum á bílum. Óheimilt er að vinna við viðgerðir á bensíntönkum eða bensínleiðslum bíla í bílageymslunni og skulu bílar sem leka bensíni eða olíu geymast utandyra. Geymsla á ónýtum eða óskráðum bílum í einkastæðum má ekki vera til óþæginda fyrir aðra íbúa. Með óþægindum er átt við bíla sem valda sjón og / eða lyktarmengun. Óheimilt er að geyma hjólbarða, húsgögn, rusl eða eldfim efni í bílageymslunni og gildir þá einu þó að um einkastæði sé að ræða.

4.gr.

Akstur vélknúinna ökutækja inn á sameiginlega lóð ofan á bílageymslunni er óheimill. Með vélknúnum ökutækjum er átt við allar gerðir bifreiða, vélhjóla og vinnutækja. Allur slíkur akstur verður umsvifalaust kærður til lögreglu. Lausagangur bifreiða í bílageymslunni er bannaður. Endurvinnslukör eru staðsett í bílageymslu og eru þau til notkunar fyrir alla íbúa. Merkingar eru við körin hvað má setja í þau og skulu íbúar fylgja þeim leiðbeiningum í hvívetna.

Húsfélagið Skeljagranda 1,3,5 og 7

Samþykkt á húsfundi húsfélagsins 25.júní 2026

Viðauki við húsreglur Húsfélagsins Skeljagranda 1,3,5 og 7

Hleðsla rafbíla í bílageymslu

1. Gildissvið og tilgangur

Reglur þessar gilda um uppsetningu og notkun hleðslustöðva fyrir rafbíla og tengiltvinnbíla í bílageymslu húsfélagsins.
Tilgangur reglnanna er að tryggja örugga og faglega uppsetningu hleðslubúnaðar, skýra ábyrgð eigenda og tryggja að húsfélagið hafi yfirsýn yfir þann búnað sem settur er upp.
Í bílageymslunni fylgir hverri íbúð eitt bílastæði sem er séreign viðkomandi íbúðar. Húsfélagið hefur látið yfirfara rafmagnstöflur og gera þær tilbúnar fyrir tengingu hleðslustöðvar við hvert stæði. Lagnaleiðir frá rafmagnstöflum að stæðum eru til staðar.

2. Heimild og tilkynning til stjórnar

Eiganda er heimilt að láta setja upp hleðslustöð við sitt stæði, enda sé farið að reglum þessum og gildandi kröfum um rafmagnsöryggi, brunavarnir og frágang í sameign.
Áður en framkvæmdir hefjast skal eigandi tilkynna stjórn húsfélags um fyrirhugaða uppsetningu og leggja fram eftirfarandi upplýsingar:
a. Nafn eiganda og númer íbúðar.
b. Númer bílastæðis.
c. Nafn og kennitölu löggilts rafverktaka.
d. Tegund, framleiðanda og gerð hleðslustöðvar.
e. Staðfestingu á að hleðslustöð sé uppsett á vegg og að hámarki 16A.
f. Fyrirhugaðan tíma framkvæmda.
Stjórn húsfélags heldur skrá yfir uppsettar hleðslustöðvar, staðsetningu þeirra, tegund búnaðar og þann rafverktaka sem annaðist framkvæmdina.

3. Kröfur til búnaðar og framkvæmdar

Aðeins er heimilt að nota veggfesta, viðurkennda einfasa hleðslustöð sem er sérstaklega ætluð til hleðslu rafbíla og skal hún vera að hámarki 16A.
Allar rafmagnsframkvæmdir skulu unnar af löggiltum rafverktaka. Eiganda er óheimilt að framkvæma sjálfur rafmagnsvinnu, leggja kapal, tengja búnað eða gera breytingar á rafmagnstöflu, lögnum eða öðrum búnaði í sameign. Rafmagnskapal skal leggja eftir fyrirliggjandi lagnaleiðum.
Frágangur skal vera snyrtilegur, öruggur og þannig að hann hindri ekki umferð, þrif, aðgang að rafmagnstöflum, flóttaleiðir, slökkvibúnað eða aðkomu viðbragðsaðila.
Að framkvæmd lokinni skal eigandi skila stjórn húsfélagsins staðfestingu frá rafverktaka um að verkið hafi verið unnið í samræmi við gildandi reglur og kröfur.

4. Kostnaður, eignarhald og ábyrgð

Eigandi sem óskar eftir hleðslustöð við sitt stæði ber allan kostnað af þeirri framkvæmd.
Til kostnaðar telst meðal annars kaup á hleðslustöð, lagning kapals, tenging við rafmagnstöflu, vinna rafverktaka, efni, festingar, merkingar, úttektir og annar nauðsynlegur frágangur.
Hleðslustöð, kapall og annar búnaður sem settur er upp vegna hleðslu við tiltekið stæði er á ábyrgð viðkomandi eiganda.
Eigandi ber ábyrgð á viðhaldi, viðgerðum, endurnýjun og eftir atvikum fjarlægingu búnaðarins.

5. Óheimilar tengingar og notkun

Óheimilt er að hlaða rafbíl eða tengiltvinnbíl í bílageymslu með venjulegum framlengingarsnúrum, lausum heimahleðslusnúrum, ferðahleðslutækjum eða öðrum lausabúnaði.
Óheimilt er að hlaða bifreið úr almennum innstungum í sameign.
Óheimilt er að leggja snúrur eða kapla yfir akstursleiðir, gönguleiðir eða milli stæða þannig að þeir geti valdið fallhættu, aksturshættu, brunahættu eða öðrum óþægindum.
Óheimilt er að tengja hleðslustöð, breyta tengingum, færa búnað eða auka afl hleðslustöðvar án samþykkis stjórnar húsfélagsins og aðkomu löggilts rafverktaka.

6. Bilun, eftirlit og úrbætur

Verði bilun, skemmd eða grunur um óöryggi í hleðslustöð eða tengdum búnaði skal eigandi tafarlaust hætta notkun og láta löggiltan rafverktaka yfirfara búnaðinn.
Stjórn húsfélags getur krafist úrbóta eða stöðvað notkun hleðslustöðvar tímabundið ef rökstuddur grunur er um að búnaður eða notkun hans geti skapað hættu, valdið tjóni eða haft áhrif á raflagnir fjölbýlishúsanna.
Bregðist eigandi ekki við kröfu um úrbætur getur húsfélagið gripið til viðeigandi ráðstafana samkvæmt húsreglum, lögum og almennum reglum fjöleignarhúsaréttar.

7. Eigendaskipti

Við sölu íbúðar eða eigendaskipti skal seljandi upplýsa kaupanda um hleðslubúnað við stæðið og þær reglur sem um hann gilda.
Nýr eigandi tekur við réttindum og skyldum vegna hleðslubúnaðar sem fylgir stæðinu, nema búnaður hafi verið fjarlægður eða samið sé sérstaklega um annað.

8. Samþykkt og gildistaka

Reglur þessar eru samþykktar á húsfundi húsfélagsins þann 25.06.2026 og taka gildi frá sama degi.
Reglurnar eru hluti af húsreglum húsfélagsins og gilda um alla eigendur, íbúa og aðra sem hafa afnot af bílageymslu hússins.